સુરત: આજના સમયમાં જ્યાં સ્વિમિંગ ક્લાસ માટે લોકો મોટી ફી ચૂકવતા હોય છે, ત્યાં સુરતના રાંદેર વિસ્તારમાં રહેતા ગૌરાંગભાઈ છેલ્લા 20 વર્ષથી સંપૂર્ણ નિઃશુલ્ક સ્વિમિંગ તાલીમ આપી સમાજસેવાનું અનોખું ઉદાહરણ પૂરું પાડી રહ્યા છે. તેમની નિઃસ્વાર્થ સેવાભાવના કારણે અત્યાર સુધીમાં સેંકડો યુવાનો અને બાળકો સ્વિમિંગ શીખી ચૂક્યા છે, જેમાંથી દર વર્ષે અંદાજે 60 થી 70 જેટલા તરવૈયાઓ તેમના માર્ગદર્શન હેઠળ તાલીમ મેળવે છે તથા વેકેશન બેચ દરમિયાન અલગથી વિદ્યાર્થીઓ પણ તાલીમ લેવા આવતા હોય છે અનેક તરવૈયાઓ નેશનલ તેમજ ઈન્ટરનેશનલ સ્તરની સ્પર્ધાઓમાં ભાગ લેવા પણ સ્વિમિંગ ક્લાસ જવા પહેલા તેમના પાસે તાલીમ મેળવી અનેક મેડલ જીતી સુરત અને દેશનું નામ રોશન કરી રહ્યા છે.
ગૌરાંગભાઈ માટે સ્વિમિંગ માત્ર રમત નથી, પરંતુ જીવન બચાવતી આવશ્યક કળા છે. તેમનો એક જ સંદેશ છે કે “દરેક વ્યક્તિને સ્વિમિંગ આવડવું જ જોઈએ.” તેઓ માને છે કે પૂરની સ્થિતિ, નદી-તળાવ કે અન્ય કોઈ પણ જળસંકટ જેવી ઈમર્જન્સીમાં સ્વિમિંગનું જ્ઞાન વ્યક્તિનો જીવ બચાવી શકે છે. આ જ ઉદ્દેશ્ય સાથે તેઓ વર્ષોથી કોઈપણ પ્રકારની ફી લીધા વગર લોકોને તાલીમ આપી રહ્યા છે.
તેમની પાસે તાલીમ લેવા માટે બાળકો, યુવાઓ ઉપરાંત અનેક વયસ્કો પણ પહોંચે છે. તાલીમ દરમિયાન તેઓ માત્ર તરવાની ટેક્નિક જ નહીં, પરંતુ પાણીમાં સુરક્ષા, આત્મવિશ્વાસ, શિસ્ત અને ફિટનેસ પર પણ વિશેષ ભાર મૂકે છે.
સમાજમાં નિઃસ્વાર્થ સેવા અને રમતગમતને પ્રોત્સાહન આપવાનું કાર્ય કરતા ગૌરાંગભાઈ આજે અનેક લોકો માટે પ્રેરણાસ્ત્રોત બન્યા છે. કોઈપણ પ્રકારની પ્રસિદ્ધિ કે લાભની અપેક્ષા વગર છેલ્લા દસ વર્ષથી તેઓ સતત પોતાની સેવા ચાલુ રાખી છે. તેમના પ્રયાસોથી અનેક પરિવારોમાં આત્મવિશ્વાસ વધ્યો છે અને અનેક યુવાનોને રમતગમતમાં નવી ઓળખ મળી છે.
ગૌરાંગભાઈની આ નિઃશુલ્ક સેવા એ સાબિત કરે છે કે સમાજમાં પરિવર્તન લાવવા માટે માત્ર ઈચ્છાશક્તિ અને સેવાભાવ જ પૂરતા હોય છે. છેલ્લા ૨૦ વર્ષથી તેઓ જે કાર્ય કરી રહ્યા છે તે ખરેખર સમાજ માટે એક પ્રેરણાદાયી પહેલ છે અને તેમની આ સેવા પ્રશંસાને પાત્ર છે.
