સુરત: ઇન્ટરનેશનલ ઇન્સ્ટિટ્યૂટ ઓફ ફેશન ડિઝાઇન (IIFD), સુરત દ્વારા આજ રોજ ( 9 જૂન, 2026)ના રોજ સરસાણા કન્વેન્શન સેન્ટરમાં તેના વાર્ષિક ફેશન શોકેસ “ફેશોનેટ 2026″નું સફળ આયોજન કરવામાં આવ્યું હતું. આ ઇવેન્ટમાં સર્જનાત્મકતા, કલા-કૌશલ્ય, નવીનતા અને ફેશન ક્ષેત્રની શ્રેષ્ઠતાનું ભવ્ય પ્રદર્શન કરવામાં આવ્યું હતું.
IIFD સુરતની સ્થાપના વર્ષ 2014માં થઈ હતી. શરૂઆતથી જ આ સંસ્થા ગુજરાતની અગ્રણી ક્રિએટિવ એજ્યુકેશન સંસ્થાઓમાં સ્થાન પામી છે, જે ફેશન ડિઝાઇન, ઇન્ટિરિયર ડિઝાઇન અને ઇવેન્ટ મેનેજમેન્ટ ક્ષેત્રે ઉભરતા પ્રોફેશનલ્સને સતત પ્રોત્સાહન આપી રહી છે. વર્ષો દરમિયાન સંસ્થાએ નવીનતા, કલા-કૌશલ્ય અને ઉદ્યોગલક્ષી શિક્ષણની મજબૂત પરંપરા ઊભી કરી છે, જેના કારણે સર્જનાત્મકતાને પ્રોત્સાહન મળ્યું છે અને યુવા પ્રતિભાઓને પોતાની કાબેલિયત દર્શાવવા માટે ઉત્તમ મંચ મળ્યો છે.
સંસ્થાએ પોતાના ક્રિએટિવ વિઝનને વધુ વિસ્તૃત કરતા ZICA સુરતની પણ શરૂઆત કરી છે, જે એનિમેશન, વિઝ્યુઅલ ઇફેક્ટ્સ, ગ્રાફિક ડિઝાઇન, ગેમિંગ અને ડિજિટલ આર્ટ્સ જેવા ક્ષેત્રોમાં વિશ્વસ્તરીય શિક્ષણ પ્રદાન કરવા માટે કાર્યરત છે. આ વિસ્તરણ સાથે સંસ્થા ઉભરતા કલાકારો, ડિઝાઇનર્સ અને સ્ટોરીટેલર્સ માટે નવી તકો સર્જી રહી છે તેમજ સુરતના વિકસતા ક્રિએટિવ ઇકોસિસ્ટમને વધુ મજબૂત બનાવી રહી છે.
આ વર્ષે “ફેશોનેટ 2026″એ ફરી એકવાર 200થી વધુ વિદ્યાર્થી ડિઝાઇનર્સ અને 200થી વધુ ઓરિજિનલ આઉટફિટ્સને એક જ મંચ પર લાવીને નવો માપદંડ સ્થાપિત કર્યો હતો. આ ઇવેન્ટ સુરતમાં વિદ્યાર્થીઓ દ્વારા સંચાલિત સૌથી મહત્ત્વાકાંક્ષી ફેશન શોમાંથી એક તરીકે ઉભરી આવી છે.
સુરતના ફેશન જગત માટે એક મહત્વપૂર્ણ સીમાચિહ્ન સમાન આ ઇવેન્ટમાં પ્રથમ વખત ભારતના જાણીતા કૌચર પાયોનિયર્સ શાંતનુ મહેરા અને નિખિલ મહેરાએ ઇવનિંગ ચીફ જ્યુરી તરીકે હાજરી આપી હતી. તેમની ઉપસ્થિતિએ સમગ્ર કાર્યક્રમમાં નવી ઊર્જા ભરી હતી અને યુવા ડિઝાઇનર્સને દેશના અગ્રણી ફેશન નિષ્ણાતો સમક્ષ પોતાની સર્જનાત્મકતા રજૂ કરવાની અનોખી તક આપી હતી.
આ સાંજ કલાત્મક અભિવ્યક્તિના ભવ્ય ઉત્સવ તરીકે સાબિત થઈ હતી, જેમાં સર્જનાત્મકતા, આકર્ષક ડિઝાઇન અને અવાંટ-ગાર્ડ પ્રયોગોનું અનોખું સંયોજન જોવા મળ્યું હતું. રેમ્પ પર રજૂ થયેલી દરેક કૃતિએ પોતાની આગવી સાંસ્કૃતિક વાર્તા રજૂ કરી હતી, જેમાં નવીન ટેક્સટાઇલ્સ અને આધુનિક શૈલી દ્વારા સાહસિક કલાત્મક દ્રષ્ટિકોણ પ્રદર્શિત કરવામાં આવ્યો હતો.
ઇવેન્ટના સૌથી નોંધપાત્ર શોકેસમાં ‘ગલી કી દીવારેં’ કલેક્શનનો સમાવેશ થતો હતો, જે ભૂલાઈ ગયેલી ગલીઓ, ઝાંખા પોસ્ટર્સ અને જૂના શહેરી વિસ્તારોમાં છુપાયેલી નિઃશબ્દ વાર્તાઓથી પ્રેરિત હતો. ઉપરાંત ‘વૃક્ષા – આર્ટ ઓફ સસ્ટેનેબિલિટી’એ પ્રકૃતિ અને ફેશન વચ્ચેના સુમેળને જવાબદાર અને ટકાઉ ડિઝાઇન દ્વારા રજૂ કર્યો હતો. ‘ક્લાર્ટે – રોટન બટ રીગલ’એ ખામીઓ અને ક્ષતિઓને વૈભવી સૌંદર્યમાં પરિવર્તિત કરી હતી. ‘ધ ડિસટ્રાઇબ’એ ડિસ્ટોપિયન દ્રષ્ટિકોણથી અસ્તિત્વ અને સહનશક્તિની અભિવ્યક્તિ કરી હતી. ‘ક્ષતસૌંદર્ય’એ તૂટેલી રચનાઓ અને શિલ્પોમાં રહેલા સૌંદર્યની ઉજવણી કરી હતી. ‘આર્મોરીયર’એ ભવિષ્યના વિકાસ અને શક્તિની નાટ્યાત્મક અવાંટ-ગાર્ડ વ્યાખ્યા રજૂ કરી હતી, જ્યારે ‘ઇન્ટ્રાવોઇડ’એ હાડકાંના ટિશ્યૂની સૂક્ષ્મ પરંતુ શક્તિશાળી રચનામાંથી પ્રેરણા મેળવી નબળાઈ અને મજબૂતાઈ વચ્ચેનું સંતુલન દર્શાવ્યું હતું.
છેલ્લા કેટલાક વર્ષોમાં IIFD સુરતે ઉદ્યોગો સાથેના સહયોગ, બેકસ્ટેજ અનુભવ, પ્રોફેશનલ ફેશન પ્લેટફોર્મ્સ અને શૈક્ષણિક ભાગીદારી દ્વારા વિદ્યાર્થીઓને રાષ્ટ્રીય તેમજ આંતરરાષ્ટ્રીય સ્તરે અનેક તકો ઉપલબ્ધ કરાવી છે. આ પ્રયાસો દ્વારા ક્લાસરૂમ લર્નિંગને વાસ્તવિક ઉદ્યોગ અનુભવ સાથે જોડવામાં આવ્યું છે.
આ કાર્યક્રમમાં સુરતના અગ્રણી ઉદ્યોગપતિઓ, ટેક્સટાઇલ ઉદ્યોગ સાથે સંકળાયેલા આગેવાનો, ફેશન પ્રોફેશનલ્સ, વિદ્યાર્થીઓના વાલીઓ તથા ડિઝાઇન પ્રેમીઓ મોટી સંખ્યામાં ઉપસ્થિત રહ્યા હતા. સૌએ મળીને આગામી પેઢીના ડિઝાઇનર્સની કલ્પનાશક્તિ, સમર્પણ અને કલાત્મક પ્રતિભાની ઉજવણી કરી હતી.
ઉલ્લેખનીય છે કે IIFD સુરત સંસ્થા શ્રી મુકેશ મહેશ્વરી (સ્થાપક અને ડિરેક્ટર) તથા શ્રીમતી પલ્લવી મહેશ્વરી (સહ-નિર્દેશક)ના માર્ગદર્શન અને દૂરંદેશી નેતૃત્વ હેઠળ એક મજબૂત ઇકોસિસ્ટમનું નિર્માણ કરી રહી છે, જ્યાં શિક્ષણ, નવીનતા, ઉદ્યોગ સાથેનું જોડાણ અને વૈશ્વિક દ્રષ્ટિકોણ એકસાથે વિકસે છે.
